ادارة_العلاقات_العاطفية

#ادارة_العلاقات_العاطفية
هاديك البنت لي كتبان ليك فيها سادة على قلبها بالزكروم و القفل على قلبها ، و رافضه الإرتباط نهائيًا بأي شخص خارج مسمى لأصدقاء ، ماشي حيت معقدة، اولا كتعاني من شي حاجة نفسية بسبب تجربة اثرت فيها .
بالعكس هي انسانة ذكية و عندها ادراك عالي بمعنى العلاقة و الارتباط و عارفة مزيان شنو كيعني ان جوج ديال الناس يكون بينهم شي حاجة قوية سميتها حب .

فمشاعر البنت الذكية كتكون اجمل نهار كطيح فالحب ...
حتى توابع وقوعها فالحب كيكون مختلف و مذهل لدرجة كبيرة بحال سقوط النيازك على الارض مبهرة ( التقاء السماء بالارض ) ..
كنتفكر واحد النهار قالي واحد السيد اطار عالي فاحد الشركات الكبرى و المعروفة  انه ندمان حيت تزوج  وحدة  قارية جامعية و ذكية و كتعارضه  فمواقف معينة ( طبيعي يكون عندها مواقف نابعة من عقلها و منطقها الخاص ) .. و انه كيتمنى لو كان تزوج وحدة ماقارياش من العروبية على الاقل درجة طاعتها و ال comply ديالها يكون اعلى .. بمجرد ما قال هاد جوج كلمات  فهمت شنو كان باغي  !!! .. باغي وحدة ماكتهدر ماكتسمع ما كتشوف 🙊🙉🙈 .. كاع احلامها فالحياة عرس و دار و ظل راجل و تستر ... فالحقيقة ممكن مراسم الدفن تعتبر سترة حتى هي.. الستر الكلمة اللي كلشي كيفهمها غلط بحال مثلا" صمعتكم ماتوسخش قدام ناس و حياتكم ماتكونش على لسان الناس .. سواء لمشاكل اجتماعية باينة  للناس اللي دايرين بينا او ستر مادي بحيث ما نمدوش يدينا لحتى شي حد .. لكن الحقيقة الستر اكبر من هادشي كامل الستر هو الرضا و القناعة الشخصية اللي الانسان كيحس بيها فمكان معين و حالة معينة مع شخص معين.

نرجعو لموضوعنا ... كيف ما البنت الذكية كل حاجة فيها استثنائية و مختلفة ولكن التعامل معاها كيكون فيه خطورة حيت كتنازعك فالدور القيادي ديالك كرجل فهاد الكرة الارضية و كتنافسك فالاستعمار الذكوري اللي انت حاطو على مقدرات العلاقة ... او مقدرات الملك فالزواج  من بعد هادشي ..و لكن (جون ناش )فنظريته الشهيرة( نظرية الالعاب) قال: "ان المصالح الشخصية ،اذا كانت موجهة لهدف مشترك تكون ضاربة و فعالة بدرجة كبيرة.. "
من هنا .. نبغي نقولك  ما كاينش شي حاجة سميتها القيادة و السيطرة و الكوماندا المهم فالعلاقات هي عملية توافقية كيقودوها جوج ديال الناس  كيحاربوا لهدف مشترك .. شراكة استراتيجية الى بغينا نسميوها .. التفاهم و التنازلات الصغيرة و الاستيعاب كيلعبوا الدور الاهم فيها باش المركب و السفينة   تمشي و توصل لبر الامان و هادشي لي كنفتاقدوه للاسف فالعلاقات ديالنا بالطرف الاخر سواء كان رجل او امرأه  !!!!
#sara_latif
@sara_latif