الحلم_المغربي

#الحلم_المغربي
#Moroccan_Dream

المجتمع المغربي كايتميز ببزاف د الخصائص او الاشياء لي كاتميزو على المجتمعات لوخرين .ومن بين هاد المميزات هي داك السطل دالحلوى لي ماكايبان تا كاتجمع العائلة او كايختفي مرة اخرى ولي تقدر تعرف من قتل عقبة بن نافع ولكن ماتقدرش تعرف فينوهو السطل دالحلوى بالنافع . ملي كاتجمع ديك العائلة فديك اللحظة بالظبط كايبان موضوع خطبتنا اليوم لي هو الحلم المغربي فملي كايدور اتاي اوكايترخا بنادم كاينقز شي حد سالا كاسو هو اللول الي فالغلب كاتكون شي خالتك اولا مرت خالك...... اوكاتلوح ديك الجملة  الشهيرة "واشفتي ولد مينة سهل عليه الله" التفسير د هاد الجملة هو انه الاخ ولد مينة وصل او حقق الغاية من الخلق ديالو او كمل المهمة ديلاو بنجاح .اش دار اخالتي هاد ولد مينة ؟؟ "خدم" او" دار الدار"ا فرشها او "طونوبيل" او" خطب واحد البنت " مايكونو ولادنا انشاءالله.
صافي اخالتي هادا ماكان ؟ مالقا دوا د السيدا ما سافر حول العالم ما زاد شي عنصر كيميائي ما .......
او المشكل هادشي كايتقال فحضور لوليدات الصغار لي كايترسخ عندهم فالعقل الباطن ديالو انه النجاح فالحياة هي الدار -الخدمة -الطونوبيل - الزواج والسلام عليكم
صافي هاهو الحلم المغربي ديجا عطاوه ليك بلا ماتصدع راسك او تفكر او تامل. هادشي كايوقع او التلفازة خدامة تاكايطلع الاشهار :"صيفط 2M ل9090 وحقق حلمك وربح بارطما " اونتا زعما حيت مامتيقش كايعودوها ليك"اييه اسيدي بارطما" او شكون كايشوف فالتلفزة ف بحال هاد التجمعات غي لي كالس بزز اولا الدراري صغار اوا ها التلفازة تا هي التلو الدار حلم اولدي..... نمشيو للمدرسة واش عمر شي معلم اولا استاذ كال ل شي واحد قرا اولدي باش تصاوب لينا شي دوا اولا تصاوب لينا شي عجب.. . ماكاين غا قرا باشبر على راسك والاستاذ براسو كايكوليك باش ضبر ياعني ممكن تلقى ممكن ماتلقاش هههه غي حارب الامية باش نحسبوك قاري.
ملي كانوصلو الجامعة كاتلقى كولشي مضارب غي اشد ديك الاجازة اطونطي لا شونص فالتعليم اولا اي حاجة كاينة ماعمرك تسمع شي حد كايقرى باش ادير شي انجاز ازيد بالبلاد...... اوالو جاي اوكايفكر فالغدا وااش ارجع للدار اولا ادوز اضرب اللوبيا .....او هادشي حيت بطبيعة الحال الظروف او.....لي هوما بغاوها هكا باش نتا تفكر هكا اومايباقش ليك لوقت تفكر ف حاجة خرى .

ولينقدر نقول هو الله ارحم اللوالدين واش فايت شي حد اربح؟؟ راه عييت مانصيفط ل 9090 او  والو .

بكلافيي: Jamal Jmalki