ربما وجدنا الحياة في الفضاء

ربما وجدنا الحياة في الفضاء.
.
البارح سالات رحلة المسبار Cassini اللي سيفطاتو وكالة ناسا لحدا كوكب زحل هاد المسبار دار بزاف ديال الإكتشافات الرائعة، الصديق نجيب دار ڤيديو كايهدر فيه على كاسينس (https://goo.gl/QqgaUH).
.
يمكن وحدا من أعظم الإكتشافات اللي دارها هي فشهر ربعة منين لقا محيط مالح فيه جميع المكونات اللازمة للحياة فواحد من أقمار زحل.
زحل ثاني أكبر كوكب فالنظام الشمسي و عندو بزاف دالأقمار، واحد من هاد الأقمار سميتو Enceladus.
فالأول ما كانوش العلماء كايظنو أصلا أن الحياة ممكنة فمنطقة زحل، السبب هو أن هاد الكوكب بعيد على الشمس و درجات الحرارة جد منخفظة فيه و فالأقمار ديالو.
درجة الحرارة فسطح Enceladus مثلا هي ناقص مئتان درجة مئوية.
.
هاد القمر الصغير (250 كيلومتر فقط فالقطر ديالو) كان محمق العلماء منين دازو من حداه Voyager 1 و 2 فالثمانينيات، المورفولوجيا ديالو، السطح ديالو، الحركة ديالو فالفضاء ... بزاف داللعيبات كانو غامضين.
.
من بعد ف2015 كتاشفات Cassini أن هاد القمر عندو بحر تحت السطح ديالو و كاين شقوق على السطح ديالو كايخرج منها الما ديال داك البحر.
أو أخيرا فآبريل ديال 2017 لقاو العلماء أنه كاين ثنائي هيدروجين بوفرة فداك الما اللي كايخرج من القمر، هاد ثنائي الهيدروجين كايدل على احتمال كبير ديال تواجد حياة فبحر  Enceladus ...
نفس البيئة اللي فهاد البحر كاينة عندنا فأعماق البحار فالمناطق اللي كاتلاقا فيها الصفائح التكتونية، أو تما كاين كائنات كاتسمى Methanogen.
.
حاليا كاين مشروع ديال مسبار سميتو Enceladus Life Finder، إلى تحقق هاد المشروع غادي تسيفط ناسا مسبار لهاد القمر أو غادي نتأكدو من وجود (أو عدم وجود) الحياة تما.
.
غالبا غادي نلقاو كائنات ميكروبية، أو حتى فحالة ما لقيناهاش فهادشي غادي يعني أنه كاين شي حاجة أساسية مافهمناهاش على الحياة اللي هي معلومة مهمة فحد ذاتها.
.
هاد الإكتشاف ما عمرو كان يقدر يكون بلا الرحلة ديال Cassini اللي بدات هادي عشرين سنة و دارت اكتشافات أخرى رائعة، هاد الرحلة تقامت علينا بما يقارب ثلاث مليار دولار و نصف ... منين كاتشوف أن العالم خسر 1570 سنة 2016 فالتسلح كاتساءل فين كنا نوصلو كون نقصنا من الحرب و زدنا فالعلم.
.
صورة ديال كوكبنا الصغير ملتاقطاها Cassini من زحل.

http://renfrewshireastro.co.uk/wp-content/uploads/2017/04/Earth-from-Saturn-July-2013-Cassini.jpg

بكلافيي: Othmane Safsafi