ظاهرة Spotlight Effect

ظاهرة Spotlight Effect ... فاش كاظن بأن غاع الناس حاضينك !
تأثير بقعة الضوء Spotlight Effect هي ظاهرة للي كايميل فيها الشخص للاعتقاد بأن الآخرين مراقبينو و حاضينو.
واش باقي عاقل واحد النهار كنتي كاتمشى فالزنقة و تعكلتي ولا طحتي وغاع الناس تفرجو فيك؟ ولا فاش خرجتي من داركم ولاحظتي واحد الطاش ديال المرقة على حوايجك وجاك شعور بأن غاع الناس كايشوفو فيها؟ أكيد فايت وقعت ليك، وربما كانو من أكثر اللحظات المحرجة فحياتك. ولكن كاين احتمالات، يا حتى واحد ماداها فيك. ولا دوك الناس للي شافوك جاتهم عادية ومافكروش كفما فكرتي نتا.
الصراحة حنا البشر كانساو أننا حنا ماشي محور الكون والإنتباه عند الجميع، واخه أننا مركز العالم الخاص بينا. وكانساو أن الآخرين للي دايرين بينا ماعندهم حتى شي معرفة على ديك الطاش ديال المرقة للي فحوايجك، حيت حتى هما بحالك عايشين فمركز العوالم ديالهم الخاصة، وحتى هما مركزين غير على نفسهم. وتركيزنا الذاتي ego-centrism هو للي كاينتج هاد الظاهرة.
هاد الطريقة للي كانشوفو بيها العالم كاتخلينا نحسو بريوسنا بأن ضوء المسرح ضارب فينا (بحل داك الفنان للي فوق خشبة المسرح المظلمة ومسلط عليه الضو وغاع الجمهور كايشوف فيه) ، وحتى أصغر أخطائنا غادي نعتاقدو بأن الناس لاحظوها، لكن شوف مزيان الناس للي دايرين بيك، كاين عشرات الآلاف من الناس عايشين حياتهم الخاصة بهم، وحتى هما منتابهين لنفسهم، غير كون هاني.
بإختصار ماكينش سبب للي غايدير ليك الوسواس فالمرة الجاية للي غاتكون محروج فيها، عل الاقل نتا دابا شخص منتبه أكتر لنفسو وعارف أشناهي هاد الظاهرة، الا كنتي غادي وتعكلتي وقف وكمل طريقك عادي وبلا ماتحرج، را ماشي غاع الناس لاحظوك وفكرو كفما ظنيتي.

بكلافيي:Naoufal Ichou