ﺍﻟتنبــؤ_بالمستقبـــــل_بيـن_العلــم_والديـــن

#ﺍﻟتنبــؤ_بالمستقبـــــل_بيـن_العلــم_والديـــن

بزاف ديال الناس كتلقى عندهم مشاكل كتكون مشاكل ديال الخيانة والجنس والمشاكل الاجتماعية وكايقول خصني نشوف شي شوافة ولا شي عراف يشوف مالي...اولا قبل مندخلو فالموضوع ديالنا خصكوم تعرفو بلي هاد التنبؤ بداا من عند اليهود ونرجعو لواحد الطريقة معروفة عند "الحاخامات" اليهود فالتنبؤ، كايجي واحد مؤمن يهودي عندو شي مشكل فحياتو وكيتشاور مع هاد العرافين اليهود بحال شوافات عندنا، موهيم كايجيب ليه العراف الكتاب المقدس "التوراة" وكيعطيه للزبون يشدو فيدو، الزبون كيبدى يسول على شي حاجة بغى يعرفها كيقوليه العراف حل الصفحة فلانية كيحلها كيلقى الجواب ديال السؤال لي طرح واخا يكون السؤال متعلق بالمستقبل ديالو غادي يلقى الجواب، وكاينة طريقة خرى سميتها "الصلاة الخاصة" فهاد الصلاة كيكون واحد الجدول فيه 117 مربع وفكل مربع كيكون واحد الحرف وهاد الحروف لي كاينين فهاد المربعات كيعطيونا 117 جواب، موهيم كيجي الزبون كيصلي الصلاة الخاصة وكيسول السؤال لي عندو كيما كان السؤال من بعد كيغمض عينيه وكيحط صبعو على شي مربع وكيحل عينيه يشوف الحرف لي حط عليه صبعو من بعد يمشي لصفحة الاجوبة ويشوف الجواب ديال السؤال ديالو...موهيم ندخلو دابا فالموضوع ديالنا..

التنبؤ بالمستقبل، بعض المرات كاتوقع بشي لعيبة وكتصدق لك غير بتساطيح ولكن التنبؤ الحقيقي كيكون مبني على دلائل وفرضيات فقط أما التحقيق كيبقى احتمالي، والتنبؤ مكاينش غير عند العرافين والشوافات لا كاين حتى فالعلم مثلا فالعلم التنبؤ بالمستقبل كيكون مبني على قوانين حسابية رياضية مثلا فاش كاتمشي شي مركبة فضائية للقمر ولا المريخ العلماء كيتنبؤو بالوقت لي غاتوصل فيه المركبة للمريخ من خلال قوانين رياضية  وحساب السرعة ديال المركبة والمسافة بين الأرض والمريخ وسرعة دوران الكوكب ولكن هاد الحسابات كلها مكتكونش دقيقة 100 فالمية بحال البلان ديال النشرات الجوية كيقولو لك نهار تنين غاتصب شتاا وماكتصبش كتكون غير ضبابة مثلا وبعض المرات كيكون العكس حيت الحسابات مكتكونش دقيقة وكتبقى مجرد فرضيات ومهما كانت درجة وسائل الرصد عالية مغيقدروش يتنبؤو بحالة الطقس بالتدقيق كتبقى احتمالات فقط هادي من جانب العلم....

نشوفو التنبؤ بالمستقبل عند شي ناس خرين، كاينين شي ناس كتكون عندهم قدرة على توقع الأحذاث مثلا عند بعض العرافين والشوافات عندهوم واحد الاسلوب تقليدي كيتنبؤو بيه على حالة الكليان لي كيجي عندهم باش يقضيو ليه الغرض مثلا ايلا لاحظتو الشوافة كتبدى طرح الاسئلة على الكليان وكتغوت وكتكون اسئلة ديالها صارمة هاد الاسلوب الهدف منو هو ينوض الخلعة فالكليان باش يجاوب ويعطيها راس الخيط وكتبدى تخلع فالكليان باش يقدر يعطيها اكبر عدد من المعلومات لي غاتعتامد عليها من بعد باش تنبؤ بالمستقبل ديال الكليان وتقضي ليه الغرض ...
وكاينين بعض الشوافات والعرافين كيستاعنو بالقرين ديال الكليان من الجن والشياطين باش يجيب ليهم الضوسي ديال الكليان وجميع المعلومات عليه والاحوال الحاضرة والماضي ديالو باش يقدرو يعتامدو على هاد المعلومات ويتنبؤو بالمستقبل ديالو..

وكاينة واحد القضية خرى لي معروفة عند كاع الشوافات والعرافين لي كيعتامدو عليها بزاف فقراءة المستقبل هي خطوط اليد، هاد الخطوط كتكون مختالفة من انسان ل انسان وكيعتامدو عليها الشوافات باش يتنبؤو بمستقبل الزبون، كيفاش كيعتامدو عليها ؟ هاد الشوافاات كيقراو دوك التعرجات ديال خطوط اليد وكيعتامدو حتى على شكل اليد والصبعان والأظافر باش يقدرو يتنبؤو بمستقبل الكليان مثلا الشخص لي عندو صبعانو مربعة كيكون انسان عقلاني فالتفكير ديالو وانسان مجتاهد ومعقول فحياتو ولكن ناقصو الابداع والشخص لي عندو صبعان عراض كيكون انسان كثير التخمام كيخمم بزاف ولكن انسان معقول...الخ،

هاد الخطوط كيعتابروها علماء النفس بحال شي كتاب كيتقيدو فيه كاع الاحذاث لي عاشها بنادم فحياتو، ومن خلال هاد الخطوط كيسهال علينا نتنبؤو بالمستقبل ديالنا ونتوقعو الأحذاث اعتمادا على التفسير، مثلا فهاد الخطوط كاين واحد الخط رئيسي لي هو خط الحياة هاد الخط كيدل على الصحة الجسدية والنفسية ديال بنادم مثلا ايلا كان الخط واضح بزاف فهذا دليل على الصحة الجسدية والنفسية ديالك ماشي على طول العمر ديال بنادم كيف كيصحاب لشي ناس، وفالراس ديال هاد الخط ايلا شكل ليك واحد الشكل بحال النجمة مع باقي الخطوط هادشي كيعني انك عندك مشاكل وغاتعيش شي حوايج خايبين، ويلا شكل واحد الشكل ديال مثلث بحال شي جزيرة مثلا هذا كيدل على الضعف ديالك وانك انسان مكتقدرش تقاوم المشاكل ديالك، هادي كلها تفسيرات العرافين كيعتامدو عليها باش يتنبؤو بالمستقبل ديال بنادم.

وكاينين شي حوايج خرين كيتنبؤو بيهم العرافين والشوافات مثلا ايلا شفتي مشة كحلة راك انسان معندوش الزهر وايلا عطسات هاد المشة فهذا دليل ان الشتااء غادي تصب..الخ هادي كلها اشياء كيعتامدو عليها كاع العرافين والكهنة وكيستاعنو بالسحر والشعودة وتسخير الجن والشياطين باش يتجسسو على الزبون ديالهم باش يجمعو عليه اكبر قدر من المعلومات من خلالها غيتنبؤو بالمستقبل ديالو حيت الجن والشياطين عندهم قدرة على رؤية الماضي والحاضر فقط أما المستقبل لا هذاك الله بوحدو لي كيعرفو، وكاينين بزاف ديال لكتوبة على طرق التنبؤ بالمستقبل ولكن هاديك كلها كتبقى مجرد توقعات ومكاينش عليها شي دليل علمي وحتى التنبؤ بالعلم من خلالات الحسابات الرياضية مكتكونش صحيحة 100 فالمية ومكتكونش دقيقة وكتبقى مجرد فرضيات محتملة التحقيق...

هادشي تقريبا كيحرموه جميع الديانات:   دليل من التوراة 👈 (سفر التثنية 18: 10): "لاَ يُوجَدْ فِيكَ مَنْ يُجِيزُ ابْنَهُ أَوِ ابْنَتَهُ فِي النَّارِ، وَلاَ مَنْ يَعْرُفُ عِرَافَةً، وَلاَ عَائِفٌ وَلاَ مُتَفَائِلٌ وَلاَ سَاحِرٌ. وَلاَ مَنْ يَرْقِي رُقْيَةً، وَلاَ مَنْ يَسْأَلُ جَانًّا أَوْ تَابِعَةً، وَلاَ مَنْ يَسْتَشِيرُ الْمَوْتَى".

دليل من القرآن:👈 سورة البقرة‏‎:‎‏‏‎ ‎‏ ‏‎ ‎‏وَاتَّبَعُوا مَا تَتْلُوا الشَّيَاطِينُ عَلَى مُلْكِ سُلَيْمَانَ وَمَا كَفَرَ سُلَيْمَانُ وَلَكِنَّ الشَّيَاطِينَ كَفَرُوا يُعَلِّمُونَ النَّاسَ السِّحْرَ وَمَا أُنْزِلَ عَلَى الْمَلَكَيْنِ بِبَابِلَ هَارُوتَ وَمَارُوتَ وَمَا يُعَلِّمَانِ مِنْ أَحَدٍ حَتَّى يَقُولا إِنَّمَا نَحْنُ فِتْنَةٌ فَلا تَكْفُرْ فَيَتَعَلَّمُونَ مِنْهُمَا مَا يُفَرِّقُونَ بِهِ بَيْنَ الْمَرْءِ وَزَوْجِهِ وَمَا هُمْ بِضَارِّينَ بِهِ مِنْ أَحَدٍ إِلَّا بِإِذْنِ اللَّهِ وَيَتَعَلَّمُونَ مَا يَضُرُّهُمْ وَلا يَنْفَعُهُمْ وَلَقَدْ عَلِمُوا لَمَنِ اشْتَرَاهُ مَا لَهُ فِي الْآخِرَةِ مِنْ خَلاقٍ وَلَبِئْسَ مَا شَرَوْا بِهِ أَنْفُسَهُمْ لَوْ كَانُوا يَعْلَمُونَ‏‎ ‎.‎‏‏‎ ‎وكيحرمو الدين حيت كيتعتابر نوع من العلم بالغيب.
موهيم هادشي لي كاين نتمنى يكون الموضوع فالمستوى نتشاوفو فالموضوع جاي...طهلاو

بقلــم: الــــﺴـــــــﺎﻋــــﺮ