المواجهة

#دايلي_مادفكرز
#المواجهة

كنزيد نفكر كنلقى راسي كنزيد نكفر ...
و عاد كنبغي نعس ليلتي كطوال و كنزيد نسهر ...

كل شخص منا كيدوز فترة من حياتوا كيحس بتأنيب الضمير، و الندم على بعض الاخطاء لي دار فحياتو لي ممكن يكونوا عكلوا المسيرة لي كان غادي فيها، و ممكن يكونو خربقوا ليها حساباتوا كاملين ...
و لكن بعض الاحيان كيكون عندك هاد الاحساس و لكن الاشكال أنك ما عرفتي المشكل فين كاين بالضبط، كتكون حاجة ضاراك فخاطرك بالجهد و كتفكر حتى كتعيا و لكن ما كتقدرش تحط يدك على الخلل بالضبط فين كاين ...
و هنا الواحد كيخصوا يواجه راسوا و يوقف قدام المرايا و يتناقش مع راسوا يدور حوار يكون حاد و خالي من النفاق و الزواق و تجبد الدواسا كاملين من اللول الخايب و الزوين و تحطهم قدامك و ما تحاولش ترطب قلب على أي خطأ خاصك تعتارف بيه و نتا حاس بلي قودتي السوايع فيها ...

و لكن عارف ان هادشي لي قلت مجرد ترهات، لانه من المستحيل انك تحاكم راسك و تدافع فنفس الوقت ... دونك هنا خاصاك مرآة تكون حقيقية، يعني انسان لي كثيق فيه لي ممكن كتشوف راسك قداموا بانه نسخة منك، انسان كتخضر معاه و انت كلك ثقة انه ما غاديش ينافقك ممكن يعري ليك شي حوايج لي نتا بقيتي مغطي عليهم ما كنبغيش تخرجهم حيت خلاو فيك جرح و كتفادا تقيسوا لا يتزاد، و لكن خاصوا يخرج الا بغيتي يتشافى داك الجرح ... ممكن ان داك الانسان لي هضرنا عليه من خلال الحوار ديالك معاه تلقى المشكل فين كاين بالضبط و غالبا غادي تلقى الحل بين سطور دوك الاخطاء و غادي تحس براحة نفسية لانك قدرتي تخرج داك الالم و لو بنسبة قليلة انما حسن من انه يبقى يضرك فقلبك من حين لاخر ...

ضروري خاص يكون عندك هاد الانسان فحياتك، الا ما كان كن على يقين انك غادي تبقى تعاني بزاف فحياتك و صعيب انك تخرج من ديك الدوامة بسهولة، و حتى الا خرجتي اما غادي تلقى راسك ضيعتي بزااف ديال الوقت، او تلقى راسك ما بقى عندك جهد تكمل الطريق، حيت الطاقة لي كانت عندك ساليتي معاها و نتا كتحارب فامواج البحث عن الحل ...

الا عندك هاد الانسان، ما تحاولش تفرط فيه مهما كان ...
لانه يبقى طوف النجاة لي غادي يتقبلك بالخايب و الزوين ...

هذا ما كان ...

بكلافيي:Tommy Hilfiger