خطأ بسيط ف “واتس آب” الا درتيه غاتفضح

#تقنية

خطأ بسيط ف “واتس آب” الا درتيه غاتفضح غاع أسرارك.. حظي معاه !
بزاف من الناس للي كسيتعملو تطبيق “واتس آب” يقدرو يطيحو فخطأ كبير للي يمكن يكون سبب فاختراق الخصوصيات ديالهم بلا مايجيبو خبار لهادشي نهائياًٌ. وهاد الخطأ يقدر يتسبب فتسريب الصور و الفيديوات ديالهم للي كيبارطاجيوها مع صحابهم.
الخطأ هو :
تبدل النمرة ديالك بلا ماتمسح الحساب :
الا بدلتي الرقم ديال التيليفون للي كنتي خدام بيه ب”واتس آب” ولا الدِير حساب جديد بلا ماتمسح الحساب القديم، وناضت شركة الإتصالات ودارت الرقم ديالك فلاكارط جديدة وباعتها فالسوق من جديد. عرف بأن غاع الخصوصيات ديالك غاتمشي بمجرد شي واحد يشري الرقم للي كان عندك و يحل حساب ف “واتس آب”، حيت غادي يكون هاد الشخص عندو القدرة يرجع غاع الميساجات و التصاور والفيديوات ديالك.
باش تبقى هاني من هاد الناحية، كينصحو الخبراء أي واحد بغا يبدل النمرة للي خدام بيها ف (الواتس آب)، أنه يمشي ل “الإعدادات”، ويختار “الحساب”، ومنها يختار “Delete Account”،  بهاد الخطوة غايمسح الحساب من سيرفرات الشركة، وغادي يتجنب أنه يطيح فهاد الخطأ .

بكلافيي:Naoufal Ichou