#واش_بصح_التدخين_مضر #الحلقة_الاولى
السلام عليكم
يوميا الناس كتردد نفس العبارة "التدخين مضر .. التدخين مضر .. حبسو التدخين" ولكن في الواقع قلال الناس اللي كيحبسوه والعدد ديال المدخنين غادي وكيزيد، حتى الناس اللي كيقولو "التدخين مضر" كيكميو. ليوما غنشوفو اش كيوقع مللي الانسان كيكمي .. وعلاش الناس مكتحبسش من التدخين ؟؟
السجارة متكونة من 3 العناصر اساسية، التبغ "التوباكو" + الورق اللي ملفوفة فيه + فلتر (زعما كيفلتري ودكشي). في الحقيقة التبغ هو نبات مظلوم مكيضر حتى حد، ولكن المشكل اننا مكناخدوهش كيفما هو - حنا كنحرقوه، ومللي كنحرقوه هو والورق اللي ملفوف فيه كينتج اتر هاد الاحتراق تقريبا اكتر من 7000 مادة كيماوية (منهم 69 مادة مسرطنة). بعيدا على ديك 69 مادة اللي كتسبب السرطان، اجيو نشوفو تأتير السجائر على بقية الجسم، ونبداو بالدورة الدموية واللي هي اهم تأتير ديال السجائر.
التدخين كيتسبب فشي حاجة سميتها تصلب الشرايين " Arteriosclerosis" وهي ترسيب بعد المواد بحال الكلسترول ومواد خرين داخل جدار الاوعية الدموية، الاوعية الدموية دقة دقة كتبدا تضياق والمهمة ديالها حتى هي كتراجع، وبعدما كانت مرنة وتقدر تضخ الدم بقوة، كتولي بحال شي ماسورة ناشفة مكتقضرش تضخ الدم. اش كيوقع مللي هدشي كيطرا ؟؟
اللي كيطرا هو ان قدرة الجسم في انه يقدر يضخ الدم اللي فيه اكسيجين ومناعة وتغدية لأعضاء الجسم المختلفة كتراجع بشكل كبير بزاف، المناعة كتقل، ضغط الدم كيطلع بشكل كبير وكيدير حمل كبير على القلب اللي يقدر يصبر فترة ومايستحملش، حتى الاوعية الدموية تقدر تصبر على داك الضغط الكبير واحد المدة ومن وراها تنفجر، وهدشي يقدر يدير نزيف في المخ او فشي بلاصة أخرى. تقدر الاوعية الدموية تضياق لدرجة انها تسد في خطرا، ولبلاصا فين تسدات الاوعية الدموية تقدر تموت هدشي اللي كيتسمى بـ"الإسكيميا"، ايلا وقع هدشي متلا في المخ يقدر يدير شلل، ولا وقع في القلب يدير دبحة صدرية، ولا حصل في الاطراف يقدر ديك لبلاصة تبدا تموت وغيخصنا نبتروها.
هدشي اللي دكرناه غير شويا
من ضمن المواد اللي كتطلع من التدخين، واحد المادة سميتها "أحادي أكسيد الكربون" " Carbon monoxide" بحال اللي كيطلع من الشاكما ديال الطوموبيلات والمصانع، هاد الاحادي كيلصق في الكريات الحمراء وكيضارب معاها على الاكسجين اللي عليها وكيحبس الاكسجين وميخليهش يوصل للخلايا اللي حنا بغينا نسيفطو ليها اكسجين، وكيكبر الكريات الحمراء بزاااااف، يعني كيخلي الدم يولي تقيل، ومللي الدم كيولي تقيل وماشي في اوعية ضيقة، كيزيد من فرص دكشي كامل اللي دكرناه الفوق. وطبعا الجهاز العصبي في الاطراف كيبدا يضعاف ويفقد الاحساس في بزاف لبلايص. متلا اللسان المسؤول عن تدوق واستطعام الماكلا كيبدا يضعاف بزاف ومكيديرش الدور ديالو مزيان.
أي رجل في الدنيا عندو عضو في الجسم ديالو مكون غير من الاوعية الدموية وأعصاب، شد دكشي كاملو اللي دوينا عليه الفوق غاديين يعطيوك ضعف جنسي على المدى البعيد. حتى قدرة الجسم على التئام الجروح واعادة بناء الخلايا كتضعاف بزاف، هدشي كيخلي الانسان يشرف بكري وتخرج ليه تجاعيد في وجهو، و ايلا تصاب شي اصابة ميتشافاش بسرعة.
النيكوتين كيترسب في اماكن مختلفة من الجسم، بحال متلا الاسنان كيترسب عليهم وكيوليو صفرين، كيترسب على الرئة وكيكحلها، وكاينين شعيرات في الرئة سميتها " الاهداب" "Cilia" هي اللي كتنقي الهواء اللي داخل للرئة كتمحا ومكتبقاش، وهدشي كيخلي الشخص كيعاني من امراض كتيرة في الجهاز التنفسي. باراكا غير هدشي اللي دكرنا، واخا باقي شلا ما يتقال.
ولكن علاش واخا بنادم عارف هدشي، كتلقاه كيكمي ؟
تجارة السجائر ودكشي اللي متعلق بيها هي تجارة كبيرة بزاف، والناس اللي شاداه ما ساهلاش عندها نفود ودكشي، فهوما كيديرو ليك حملات كيقولو بللي "التدخين مضر" وكيوريوك تصاور كتخلعك وديك الهضرا الزوينا اللي كلنا عارفينها. ولكن من التحت كاينا دعاية ضخمة وفلوس صحيحة كتخسر باش يروجو للمنتوج ديالو، وطبعا الترويج للمنتوج مؤتر اكتر من دوك الحملات الصغار اللي كيديرو باش يحسسوك بخطورة التدخين. بحال مللي كيحطو ليك في الافلام البطل مللي كيتحنسر كيتكيف، مللي كيبغي شي وحدا وكيحل المشكل او كيلقاها كيشعل وراها ويتكيف، ومللي كيطلع الدم كيتكيف، فالولد الصغير مللي غيشوف هدشي كيتحفر ليه في دماغو بللي باش يولي داك الشخص الواعر، جزء من الشخصية ديالو خاصو يتكيف، رغم انه متبت علما ان السجائر كتأتر على المخ والنمو. البنت جزء من جادبيتها انها خاصها تكيف باش تبان قرطاسة ساطة أخويا. زيد على هدشي اننا حنا اصلا مكنعلموش ولادنا هادشي وطرق التأتير والاشهار، معندناش وعي بيها، يلاه كنقولو ليهم متكميوش حيت "التدخين مضر"، وماشي بعيد تلقا الوالدين بجوج او واحد منهم كيقول لولدو هدشي وفي نفس الوقت كيكمي قدامهم، ومللي كيجربوها ولادهم مرة – 2 مرات واكتر كيبداو يولفوها وكتولي جزء من حياتهم. وحيت النكوتين يؤدي لافراز هرمون السعادة "الدوبامين"، فكيتحول الموضوع لنوع من انواع الادمان، واخا ماشي شي ادمان قوي وساهل الانسان يحبسو ايلا بغا.
الموضوع الجاي، غندويو علا اش غيوقع للجسد ديالنا ايلا بعدنا من التدخين، وكيفاش نعرفو نحبسوه، وتـــهلاااااو.
بكلافيي: أيوب السحري
