الـــــرجــــــــــولـــــــة

"الـــــرجــــــــــولـــــــة"

الرجولة كيشوفوها بزاف فالعضو التناسلي ديالهم يعني داك العضو هو لي خلاه يكون راجل، هذا هو التفكير ديال الاغلبية ولكن اصاحبي الرجولة مكتقاسش بالاعضاء التناسلية ومكتقاسش بالبلية والشراب والحبس وكاع داك تخربيق لي دوزتي فحياتك، لا اصاحبي، الرجولة عندها معايير ومبادئ يعني ماشي حيت كاتسكر ولا مبلي ولا مدوز الحبس راك راجل ولاخر لي مامدوزش راه ماشي راجل لا، الرجولة كتاف ونفس ودراع ومعاملة وصبر وأخلاق، كتلقى واحد فعمرو 22 عام وصرف وباقي كيصرفو عليه واليديه بحال واحد النوع مخلي مو ولا ختو تخدم عليه كايفيقها مع 6 يسيفطها لخدمة ويرجع ينعس هادي هي الرجولة لي كاتعناو بيها ؟ وكاين واحد النوع اخر كيظل ناعس تال لعشية ويهز مضاية ويخرج يگريسي فعباد الله وملي تهضر معاه يقولك انا راجل، باش ؟ لي راجل كيخرج يضرب الكرفي على راسو ماكيديش ديال ناس، نهار يضوروك لحيوط وتخرج تقلب على راسك وصبرتي وتقاتلتي مع البرد والشتا وجوع والحگارة ودرتي بلاصتك وسطهم ديك ساعة عرف راسك ترجلتي، حيت الرجولة بحر باش تعوم فيه خصك الدراع والنفس ويلا مافيكش النفس بلا ماتهضر على الرجولة حيت النفس هي كولشي، حيت كيفاش غاتسمي راسك راجل ومك ولا ختك خدامة عليك ؟ كيفاش تسمي راسك راجل وواليديك كيضربو عليك تمارة ونت ناعس فدار بحال الحاملة ؟ كيفاش غاتسمي راسك راجل ونت ماهزيتي حتى راسك ؟ نعقل على راسي اول مرة خدمت مالقيتش فين نسكن كنت كنمشي عند واحد الگارديان كيحل ليا واحد رموگ ونعس فيه وخصني نفيق بكري قبل مايجي مولاه وكنت كنبات فلاكاب ديال واحد الحمام تخيل معايا انا ناعس فالبلاصة لي فيها العود والحطب ديال الحمام ناعس وسراق زيت كيطلع ليا فوق وجهي ليل كامل ومفرش غير الكارطون، تخيل معايا فالخدمة مكنقدرش نبدل حوايجي قدام الخدامة ومكنقدرش نصلي معاهم حيت لابس جوج تقاشر ماشي بحال بحال ومتقوبين من لفوق وكنت مخصوص من بزاف ديال لحوايج وتحرمت من شحال من حاجة باش نجمع راسي، تخيل معايا شحال تعدبت ولكن لي داز على الراس عمرو غادي يتنسى والحمدلله عرفت بحق الخبز منين كايجي وبلي الحلال صعيب وعرفت بحق الرجولة وعرفت بزاف ديال الحوايج واخا كانت تجربة صعيبة وتعذبت الحمدلله دابا قاد براسي وخدام على راسي وكنصرف على راسي ومامعول على حد، الانسان ايلا شاف راسو وصل لواحد السن لي غايخليه يعول على راسو يخرج يقلب على روحو واخا يكونو واليديك لاباس عليهم وكولشي موفر ليك حيت الرجولة ماشي فلوس لا، حيت غاتعلم بزاف ديال الحوايج لي غاينفعوك فحياتك من بعد خود مثال ديال العيد الكبير ايلا كنتي كاتدبح مع باك نهار تزوج غاتدبح لراسك اما ايلا مكنتيش كاتدبح مع باك نهار تزوج غاتجيب گزار يدبح لك حيت مكتعرفش، التكرفيض كايرودي بنادم وكيخليه يضرب حساب ويعرف بحق الدنيا وميبقاش معول على واليديه ويقول را لواليد خدام انا لاش نخدم لا واليديك مغيدوموش ليك حيت غايجي واحد نهار غتلقى راسك واقق بوحدك ومضورينك الحيوط وماغتعرف مادير حيت فاش كانو الناس كيتقاتلو مع الوقت باش يترجلو كنتي نت راجل بالسمية...طهلا

#ﺍﻟــــــﺴــــــــــﺎﻋـــــــﺮ