هــــل الـــــروح مــــــوجــــودة ؟

هــــل الـــــروح مــــــوجــــودة ؟

كنسمعو بالروح وكنعرفو بلي هي النفس ديال بنادم، يعني هاد الروح هي لي مخلية بنادم يعيش وبمجرد مكتخرج منو هاد الروح كايموت، يعني الروح هي اللاكس ديال الحياة...واش بصح كاينة الروح ولا لا ؟...نمشيو للموضوع ..

الروح هي واحد الحاجة كتعطي الحياة للجسد ديالنا، والانعدام ديالها كيقصينا من الحياة يعني الروح تساوي الحياة، هاد الروح كل واحد وكيفاش كيتخيلها كل واحد وكيفاش كيتصور الشكل ديالها ولكن حتى واحد معارف الشكل ديالها الحقيقي وهادشي في حالة كانت الروح موجودة بصح...

الناس لي كينكرو وجود الروح كيقولو بلي الحياة هي فقط واحد المادة والجسم هو واحد المجموعة من الخلايا مرتبة وكل خلية مسؤولة على شي دور فالجسم ديالنا واي حاجة شفناها كنحسو بيها من خلال الحواس ديالنا يعني مكيناش شي حاجة سميتها الروح..

الحواس ديال الجسم هي لي كتستقبل معلومات العالم الخارجي يعني معلومات الواقع (الحياة اليومية) وهاد الواقع او العالم الخارجي لي كنسمعوه ونشوفوه ونشموه ونحسو بيه هو فقط واحد المجموعة من الاحاسيس وهادشي لي كنشوفوه ونحسو بيه هو فقط ردود فعل الدماغ ديالنا لي كتنتجها الاشارات الكهربائية وكتسيفطها عن طريق الاعصاب..

نعطيكم مثال مثلا  داكشي لي كنشوفوه كيفاش كنشوفوه ؟..فاش كتشوف شي حاجة فهاد الحالة كادوز من عدة مراحل، هاد العملية كتبدى من "الحزمة الضوئية" هاد الحزمة كتكون فالجسم ديالنا كادوز من "القزحية" ومن القزحية ل"الشبكية" لي كاينة فلخر ديال العين..اشنو وقع فهاد الحالة ؟ هاد الضوء لي خرج من الجسم ديالنا وداز من القزحية تال الشبكية كيتحول ل اشارات كهربائية وهاد الاشارات كتمشي لواحد النقطة صغيرة فاللخر ديال المخ ديالنا فين كاين المركز ديال الشوف، وهاد المركز كيتكون من الخلايا العصبية، هاد المركز فاش كيستقبل هاد الاشارات الكهربائية  كايدير شي عمليات وهاد العمليات هي لي كتعطينا ديك الصورة لي شفناها..

مثلا كتشوف شي لوحة رسمية وقبل متعرف المعنى ديالها بلي هي لوحة على الفنان فلاني را فهاد الحالة الجسم ديالك سيفط واحد الضو للعين ديالك وهاد الضو تحول ل اشارات كهربائية وسيفطاتها العين ديالك للمخ ديالك وتعالجات وتحللات ومن بعدما حللها دماغك عطاك الصورة ديالها وعرفتي اللوحة علاش كتهضر والمعنى ديالها...

قبل مانتعمق فالموضوع خصكم تعرفو بلي المادة هي مادة الصورة والصورة هي صورة المادة، كيفاش ؟ مثلا الكرسي ولا الطابلة كيمثلو الصورة والمادة هي الخشب يعني الخشب هو مادة الكرسي والطابلة، والكرسي والطابلة هوما صورة المادة لي هي الخشب، دابا من بعدما عرفنا كيفاش كنشوفو الاشياء نشوفو دابا "المادة"..المادة فالجوهر ديالها مجهولة وهاد المادة هي لي عطاتنا الحياة يعني ايلا كان الخشب هو المادة ديال الكرسي اذا شناهي المادة ديال الحياة اي كنعيشوها؟

هاد المادة لي كتكون منها الحياة غير كنتخيلوها حيت هاد المادة كاينة فواحد العالم خر منقدروش نوصلو ليه يعني كاينة من بعد الاحاسيس ديالنا..نعطيكم مثال باش تفهمو مثلا كاين واحد السور وهاد السور كاين وراه واحد الراجل واقق، وحنا وقفين فهاد جهة ولكن مشفناهش حيت السور عالي وكيحجب علينا الرؤية وعيطنا لواحد دري صغير قلنا ليه سير شوف شكولي كاين ورا داك سور ومشى وشاف داك راجل ورجع عندنا وقالينا راه كاين واحد راجل واقف وعطانا المواصفات ديالو الدماغ ديالنا فهاد الحالة غيستقبل دوك المواصفات لي عطانا هاد الدري وغيرسم لينا صورة لداك الراجل لي واقف ورا السور واخا مشفناهش، ولكن واش هاد الصورة لي عطانا الدماغ ديالنا مطابقة مع الصورة ديال داك الراجل بصح ؟ ولا لا، طبعا لا حيت كل واحد فينا وكيفاش غايتصور الصورة ديال داك الراجل يعني ماشي مطابقة..

فهاد الحالة هاد الراجل لي واقف ورا السور كيمثل المادة وداك دري لي سيفطناه يشوف ورا السور كيمثل الضوء وحنا كنمثلو الادمغة لي غتستقبل المواصفات لي عطاها لينا داك دري لي كيمثل الضوء على داك الراجل لي كيمثل الضوء..مثلا النجوم كنعرفو المادة والصورة ديالها من خلال الضو ديالها ولكن المادة ديال الثقوب السوداء منقدروش نعرفو المادة ديالها حيت مكاينش داك الرابط ديال الضو..

مثلا كتاخد تفاحة وتاكلها وتحس بحلاوتها وبمجرد مكتشوفها كتعرفها تفاحة ولكن واش عارف الحقيقة ديالها ؟ طبعا لا معارفش حيت هادشي لي كتشوفو وكتشمو وتدوقو هو فقط احاسيس لا غير..

كيف قلت ليكم المركز ديال الشوف كاين فالمخ وهاد المخ معزول فواحد البلصة مظلمة فالجمجمة وكاين وسط الظلام داخل الجمجمة ولكن واخا كاين المخ وسط الظلام كنشوفو الضو ولكن كيفاش المخ كاين فالظلام ومع ذلك كنشوفو الضو ؟ فهاد الحالة حنا كنشوفو فقط معلومات على المادة ولكن كيفاش كنشوفو هاد المعلومات واخا المخ كاين وسط الظلام ؟ الجواب العلمي كيقول بلي العين كتوصل المعلومات للمخ والمخ كيعطينا صورة واخا كاين فالظلام يعني كنشوفو بالمخ ديالنا...

المخ كيتكون من الخلايا العصبية وهاد الخلايا مكتسمع ماكتشوف وفكل خلية كاينة ذرة صماء و ذرة عمياء اذا كيفاش غايشوف هاد المخ ؟ وكيفاش غايحس بداكشي لي كتسيفطو ليه العين ؟ لابدا غيكون شي كائن كيشوف وكيسمع بعيد من المخ هاد الكائن كاين فالجسد ديالنا ولكن معرفينوش...هاد الكائن هو الروح...اذا الروح موجودة قال الله عز وجل "ويسألونك عن الروح قل الروح من أمر ربي وما أوتيتم من العلم إلا قليلا" صدق الله العظيم...موهيم هادشي لي كاين حاولت نعطيكم فكرة على الموضوع ونتمنى يعجبكم كان ممكن نعطي فرضيات وشي حاجة من العلم وناقش الموضوع ولكن الوقت مكاينش على العموم تقبلو مني المجهود والسلام عليكم في موضوع آخر.

بقلــم: الـﺴـــــــﺎﻋــــﺮ
Gerard Lopez