السيبــليـمينــــــــــال" Subliminal.

"السيبــليـمينــــــــــال"
Subliminal.

بعض المرات كتكون كاعي كاتخدم المزيكة كتنسى وكاتكالمى، وبعض المرات كيوقع العكس يعني كاتزيد تعصب ولا تبكي ولكن فكلتا الحالات المزيكة كاتأثر فيك تقدر تحقد وتقدر تبكي ولكن معرفتيش كيفاش كيوقع هادشي حيت مكتحكمش فيه...نمشيو للموضوع..

العلماء من بعدما دارو بزاف ديال الدراسات على بنادم لقاو بلي الانسان يقدر يدرك ويعرف بزاف ديال الحوايج بلا مايخدم الحواس ديالو يعني بلا ميعتامد على عينيه وودنيه..الخ، كيفاش ؟، خصكم تعرفو بلي العقل الباطن كيسجل شحال من حاجة مكيدركهاش العقل الواعي ديالنا، هاد التسجيلات لي كيسجلها العقل الباطن بطريقة غير مباشرة كتأثر فبنادم وكتأثر فالتفكير والشعور ديالو وكتأثر حتى على المعاملات ديالو والصحة ديالو، بحالاش ؟ مثلا شي درية تفارق معاها شي صاحبها مثلا كتمشي كتخدم شي مزيكة حزينة فهاد الحالة المزيكة غتأثر فهاد الدرية وغتعطينا واحد رد الفعل لي هو البكاء وبالتالي غاتبكي..هذا هو "السيبليمينال" أو "التأثير اللاوعي"..

فالحرب العالمية الثانية ناضو العلماء بغاو يشوفو هاد التأثير ديال اللاوعي (السيبليمينال) على الجنود ولقاو بلي الجنود عندهم مشكل، شناهوا هاد المشكل ؟ الجنود مكيقدروش يميزو بين الطائرات ديالهم والطائرات ديال العدو لدرجة انهم كيطلقو القرطاس على الطائرات ديالهم بالخطأ حيت مقدروش يفرقو بين الطائرات ديالهم والطائرات ديال العدو، العلماء باش يحلو هاد المشكل ناضو ختارعو واحد الجهاز سميتو "تاتشيستوسكوب" بحال جهاز "داتا شو" لي كيخدمو بيهم حاليا فالجامعات  والاقسام، موهيم من بعدما ختارعوه بداو يدوزو فيه تصاور ديال الطائرات ويعرضوهوم على الجنود بزربة باش يشوفو واش غيعقلو عليهم ولا لا، وفعلا الجنود عقلو عليها وقدرو يميزو بين الطائرات مع العلم ان تصاور ديال طائرات تعرضات عليهم بزربة ومع ذلك عقلو عليها..

هنا العلماء غيلقاو بلي العقل الباطن عندو قدرة على التمييز بين الصور والاصوات والاشكال والكلمات ايلا دازت قدام العين بزربة حيت فهاد الحالة العقل الباطن كيسجلها وكاع هدشي لي كيسجلو كيأثر على بنادم كثر من داكشي لي كايدركو العقل الواعي ديالو..

من بعدما بانت هاد الظاهرة ديال "السيبليمينال" غينوضو شي وحدين يستعملوها فالدعايات بحال المروج الاعلاني "جيمس فيساري" هاد السيد ناض استعمل جهاز "تاتشيستوسكوب" فالسينيما ودخل فيها شي جمل وكلمات كادوز دغيا وسط الفيلم هاد الجمل بحال "هل انت عطشان ؟ اشرب كوكا كولا" مع المدة بداو الناس يشريو كوكا كولا وهنا بان التأثير ديال "السيبليمينال" على بنادم، ناض هاد السيد "جيمس" طرح هاد الفكرة على الشركات التجارية وبداو يستعملوها فالاشهارات والاعلانات ورجعات عليهم بربح كبير..

وهاد البلان ديال "السيبليمينال" ستافدو منو حتى السياسيين فالحرب بحال "غوبلز" مؤسس الدعاية النازية لي كان داير بيفان فالطرقان باش ملي يكون كيخطب يأثر فالالمان ويشعل فيهم حماس الحرب، واستعملها الدكتاتور الصيني "ماو تسي تونغ" فالثورة الثقافية فاش حرض الطلبة والتلاميذ على الاساتذة وقاليهم بلي خصكم تقتلو الاساتذة...

مع المدة لقاو العلماء بلي هاد "السيبليمينال" ماعندوش علاقة غير بالسينما والافلام لقاو بلي كاين حتى فالموسيقى والاعلانات والصور، ف 1979 ناض واحد السيد ختارع واحد الجهاز كيمنع السرقة وداروه فالمحلات والحوانت، هاد الجهاز مسجلين فيه شي رسائل كيأثرو فاللاوعي ديال الكليان وكتخليهم مايشفرش ومع المدة تراجعات نسبة السرقة فالمحلات التجارية..
علماء النفس كيقولو بلي هاد التأثير ديال الرسائل الخفية والصور والاصوات كيشبه للتنويم المغناطيسي حيت هاد الميصاجات وهاد الرسائل الخفية عندها قدرة على مخاطبة العقل الباطن وكتأثر فيه بطريقة غير مباشرة بسرعة على عكس التنويم المغناطيسي لي كيتطلب وقت..

كيف قلت ليكم هاد الرسائل الخفية لي كيسجلها العقل الباطن كتأثر فبنادم اما سلبيا اما ايجابيا، هاد الرسائل عندها شي فوائد كتخلي بنادم يتخلص من دوك النزاعات النفسية بحال الكآبة والغضب والحقد...الخ، ناضو شي شركات استغلو هاد الفكرة وسجلو شي سيديات باش يعالجو الحالات النفسية هاد سيديات فيهم ميصاجات لي غيساعدو المريض على الشفاء وهاد القضية كيستعملوها شي قنوات فكندا كيسيفطو رسائل خفية مع المزيكة فالليل باش يهدؤو الاعصاب ديال بنادم وباش يفيق فالصباح ناشط..

"السيبليمينال" هو واحد المجموعة من الرسائل الخفية غير مباشرة كيسجلها العقل اللاوعي وكتأثر فبنادم اما سلبيا اما ايجابيا، هاد "السيبليمينال" فيه انواع، كاين السيبليمينال الصوتي لي كيتكون من الكلمات الصوتية هاد الكلمات كتولد واحد الاشارات دبدبية كتمشي للعقل اللاوعي وكتأثر عليه وبالتالي كتأثر فالمعاملات ديال بنادم بحال المزيكة، وكاين السيبليمينال الكتابي كيدوزو فيه كلمات وسط مشاهد بحال السينما والاشهارات، وكاين السيبليمينال الصورة  بحال النشرات الجوية..الخ..

موهيم هادشي لي كاين نتمنى يكون الموضوع فالمستوى وقبلو علينا، نتشاوفو فشي موضوع جديد طهلاو.

بقلــم: الـﺴـــــــﺎﻋــــﺮ
Gerard Lopez