الكـــــــانيبــــــاليـــزم" أكــل لحــــــوم البشــــــــر. Cannibalism.

"الكـــــــانيبــــــاليـــزم" أكــل لحــــــوم البشــــــــر.
Cannibalism.

شي مرة جاك جوع، عمرك فكرتي تقطع طرف ديال لحم من يدك ولا رجلك وديرو فشواية حتى يطيب وتعشى بيه ؟...نمشيو للموضوع..

"الكانيباليزم" أو "أكل لحوم البشر" هاد البلان عندو تاريخ وداز فبزاف ديال الحضارات والقبائل لي كانو كياكلو اللحم ديال بنادم، هاد الكانيباليزم كاين حتى عند الحيوانات لي كياكلو الجثث ديال الحيوانات الميتة، هادي بصفة عامة وكاين نوع آخر ديال الكانيباليزم سميتو "الكانيباليزم الذاتي" فهاد الكانيباليزم الذاتي بنادم كياكل لحمو مثلا يقطع رجلو ولا يدو ويشويها وياكلها ولا ياكلها هكاك خضرا، هاد الكانيباليزم كيتسببو فيها امراض نفسية وامراض وراثية كتخلي بنادم ياكل لحمو..شناهي هاد الامراض ؟

من بين هاد الامراض كاين واحد المرض سميتو " ليش_نيهان" هاد المرض وراثي كايخلي بنادم يعض قنانفو ويعض لسانو فاش كايتعصب وكيخلي بنادم يعض ظفرانو، وكاين مرض خر سميتو "رابونزيل" هاد المرض كيخلي بنادم ياكل شعرو..

هاد "الكانيباليزم" ماشي بالضرورة يكون بنادم مريض نفسيا وعقليا باش ياكل لحمو لا لا، كاينين ناس بصحتهم مامراض ماوالو وكياكلو لحمهم بخاطرهم بحال شي جماعات كيشربو دمهم كنوع من طقوس "الفامبيرز" وكانو بعض الامهات فشي مجتمعات بدائية ملي كيولدو كياكلو الحبل السري وداك لحم لاخر، وكاينة واحد الحالة خرى ديال واحد الرسام سميتو "ماركو ايفارتسي" هاد السيد ناض عرض على صحابو يتعشاو عندو فدار وملي جاو يشوفو العشاء لي وجد ليهم لقاوه صاوبو من الشحمة ديالو..

هاد "الكانيباليزم" كانو كيديروه كنوع من التعذيب فالسجون فيامات الحرب، ف 1991 فالسودان كانو الجيوش فجنوب السودان كيشدو السجناء ويبززو عليهم ياكلو اعضاء من لحمهم وكيبززو عليهم ياكلو ودنيهم ويلا مبغاوش كيقطعو ليهم ودنيهم ويعطيوهم ليهم ياكلوهم بزز منهم، وكانت هاد القضية حتى فميريكان كانو المراكنة شدو شي وحدين من الهنود الحمر وبززو عليهم ياكلو اعضائهم التناسلية...

هاد الكانيباليزم كاين حتى عند بعض الحيوانات بحال الفار فاش كيجيه جوع ومكيلقى ماياكل كتبان ليه الزنطيطة ديالو فالبلان وكياكلها. ونفس الشيء كيديرو الاخطبوط فاش كاتجيه الحكة فشي رجل كياكلها ونفس البلان حتى مع القرش فاش كيتجرح من شي بلاصة..

هاد الكانيباليزم دارو عليها بزاف ديال الافلام ممنوعة من العرض بحال "كانيبال هولوكوست" و فيلم "هانيبال" لي مثل فيه "هانيبال ليكتر" فهاد الفيلم غايشد هاد السيد واحد الضحية وغايجبد المخ ديالها وغايديرو فمقلة يتشوا (فيلم حقيقي)...

هاد الكانيباليزم وأكل لحوم البشر عندو تاريخ فالحضارات والاساطير الاغريقية بحال اسطورة "كرونوس" إله الزمن لي كلا ولادو، كيقولو بعض العلماء بلي الشذوذ الجنسي هو لي كيخلي بنادم ياكل لحمو واللحم ديال بنادم ولكن كيف قلت فاللول بلي هادشي ماشي بالضرورة يكون بنادم مريض حيت حتى المعتقذات والطقوس كتخلي بنادم يدير كثر من هادشي مثلا فشي حضارات وشي قبائل كانو الناس كيحساب ليهم ايلا كلاو لحم ديال شي حد راه غادي يهزوه معاهم يعني غادي يندامج الجسد ديالو مع الجسد ديالهم  وكانو كياكلو الجثث ديال جدودهم وماواتهم باش زعما يعاودو يحييوهوم فالجسد ديالهم (مثلا شي صاحبك مات وبغيتيه يعاود يحيا غاتمشي غتاكل الجثة ديالو وهكا غادي يعاود يحيا فالجسد ديالك وغايتشارك معاك الجسد ديالك)..

وكاينة شي طقوس خرى بحال طقوس "النيكرومانسي" فهاد الطقوس بنادم كيدير شي سحور وكايجيب الجثة ديال شي واحد ميت وياكلها باش زعما ياخد دوك المعلومات والتجارب لي كتاسبها داك الميت فاش كان باقي حي...هاد حالة الكانيباليزم واكل لحوم البشر كانت فشي دول بحال مصر فيامات المجاعة فعهد "المستعصم بالله" كانو كيخطفو دراري والعيالات وياكلوهوم حيت ماكان عندهم مياكلو وكان هذا هو الحل بالنسبة ليهم باش يواجهو المجاعة...موهيم هادشي لي كاين حاولت نعطيكم فكرة على الموضوع ونتمنى يكون فالمستوى وكالعادة نتلاقاو فشي موضوع خر..دمتم سالمين

بقلــم: الـﺴـــــــﺎﻋــــﺮ
Gerard Lopez