واش بنـــادم أصلـــو قرد ؟

واش بنـــادم أصلـــو قرد ؟

"نظــريــــة التطــــور" تشــارلــز دارويـــن

فهاد الموضوع غنهضر على وحدة من أكثر النظريات جدالا فالتاريخ، كلكم سامعين بيها وأي واحد سولتيه عليها غادي يقولك "بنادم أصلو قرد"....موهيم نمشيو للموضوع..

"تشارلز روبرت داروين" عالم فالجيولوجيا والتاريخ الطبيعي، "داروين" ف 1838 غيبدى يدرس الكائنات الحية وكيفاش كيتحولو الكائنات عن طريق "الطفرات" هنا "داروين" غايبني النظرية ديالو لي هي "الانتخاب الطبيعي"...هاد نظرية "التطور" كتعني التغيير ف الصفات الوراثية يعني داكشي لي كيتكون منو الجسم كيسميها "السمات الجسمية" لي كتكون متوارثة عند الكائنات الحية مع المدة الشيء لي كايعطينا انواع جديدة من الكائنات الحية...

نظرية التطور فيها جوج حوايج خصك تعرفهم لي هوما: التطور والانتخاب الطبيعي، ومايمكنش لك تفهم هاد النظرية ايلا مكنتيش عارف هاد جوج حوايج (التطور والانتخاب الطبيعي)، نشرحهوم ليكم: نبداو بالتطور، التطور: زعما مثلا عندنا واحد الكائن حي إنسان مثلا هاد الانسان كيكتاسب واحد الحاجة جديدة كتخليه يبقى عايش ويقاوم مثلا بحال المناعة...الخ، نمشيو دابا ل"الانتخاب الطبيعي"، الانتخاب الطبيعي كيقولك بلي دوك الكائنات لي كتكتاسب سمات كتخليها تعيش هي لي كتبقى حية مثلا شي شخص كتاسب مناعة ضد شي مرض غادي يبقى عايش اما لي معندوش مناعة ضد داك المرض غادي يموت.

مثلا: ناخدو واحد العينة من البكتيريا هاد العينة فيها 20 خلية مثلا ولكن فهاد 20 خلية كاينة واحد الخلية وقعات ليها "طفرة جينية" وهاد الطفرة غادي تخلي هاد الخلية تكتاسب مناعة مثلا، ولكن دوك 19 خلية لخرين غيبقاو كيما هوما باستثناء هاد الخلية بوحدها كتاسبات مناعة، من بعد غايجي واحد التأثير خارجي مثلا شي "مضاد حيوي" هاد الخلايا كولهم غادين يموتو باستثناء ديك الخلية بوحدها ماغدي يطرا ليها والو حيت عندها مناعة ضد "المضاد الحيوي" أو "التأثير الخارجي" وهاد الخلية غادي تنقل ديك المناعة أو "السمات الجينية" لي كتاسباتها، غادي تنقلها من جيل لجيل بواسطة "الانقسام" والخلايا البكتيرية لخرى لي معندهاش هاد "السمات الجينية" غادي تبدى تنقارض بشوية بشوية، في حين الخلية لي كتاسبات "السمات الجينية" غادي تبقى عايشة وتكاثر..

هذا ☝هو التطور والانتخاب الطبيعي، وهاد التطور ميمكنش ينطابق غير على فرد أو خلية وحدة لا خصو ينطابق على مجموعة حيت الخلية ايلا مقدراتش تنقل ديك السمة الجينية لي كتاسباتها للأجيال القادمة غادي يموتو قبل ماتوصلهم هاد "السمة الجينية" لي غادة تمكنهم من البقاء والعيش، يعني خص يكون هاد التطور داخل مجموعة باش يقدر يوصل لأكبر عدد من الاجيال قبل مايموتو وهنا كتبان القوة ديال الخلية لي كيتعتابر شرط اساسي باش يوقع هاد التطور، وهاد السمة الجينية لي كتاسباتها هاد الخلية تقدر تكون مكتناسبش الخلايا لخرى مثلا بحالا كتاسبتي مثلا واحد المناعة ولكن هاد المناعة كتكون غير ضد واحد المرض معين يعني ماشي مناعة لكاع الامراض، نفس الشيء عند هاد الخلية مثلا ايلا مكانتش هاد "السمة الجينية" لي غادي توصلها للاجيال لخرى نافعة تقدر تسبب ليهم فالموت الجماعي...

كيفاش يمكن لينا نشوفو هاد التطور والحذوث ديال هاد التغييرات ؟... اولا ايلا بغيتي تشوف هاد التطور خص يكون عمرك طويل باش تقدر تشوف التغيير ولكن القضية مستحيلة حيت التطور كيتطلب وقت طويل حيت بعض التغيرات كاتطلب ملايين السنين وميمكنش لبنادم يبقى عايش كثر من 80 او 100 عام باش يشور تغيرات كتطلب آلاف وملايين السنين، هنا غايخصنا نستاعنو ب"السجل الأحفوري" وهاد السجل الأحفوري هو دوك البقايا ديال الكائنات المنقرضة لي كيلقاوهم فالطبقات الصخرية، هاد البقايا كتكون فيهم معلومات على نمط الحياة ديال ديك الانواع لي نقارضات قبل وكيفاش تطورات..

وهاد السجل الاحفوري كيشمل التصاور القدام ديال أسلاف جميع الكائنات الحية لي كاينة دابا، وهو لي كيعتامدو عليه العلماء والجيولوجيين ايلا بغاو يدرسو التغيرات لي وقعات لهاد الانواع الحية، ومن بينها الانسان، هاد السجل الاحفوري شحال هادي كان اهم دليل على التطور ولكن دابا ولا دليل ثانوي ومبقاوش كيعتامدو عليه حيت جا واحد الدليل جديد وزايد عليه خبرة سميتو "علم الاحياء الجزئية" لي كيدرس العلاقات التبادلية بين الخلايا بحال الحمض النووي والحمض الريبي...الخ وعندو سمية خرى هي "علم الجينات" وكيتعتابر اقوى أدلة التطور وكيعتابر التطور "تفرعي" ماشي "سلمي"زعما ماشي على شكل سلم تراتبي، مثلا بحال الشجرة كاتنوض فروع فأجزاء ديال الجدع ومن كل فرع كيخرج فرع خر وكيسميها ب"شجرة الحياة أو شجرة التطور" بمعنى ميمكنش لشي فرع يكون فرع آخر ولا يكون شي كائن خر....

علاش ماتحولوش القرودة لإنسان ؟
...القرودة على حسب النظرية ميمكنش ليها تكون انسان حيت ميمكنش لشي كائن يولي كآئن آخر نهائيا، نظرية التطور كتقول بلي الانسان مكيختالفش على الكائنات لخرى إنما "متميز"عليهم فقط وكل كائن كيتميز على كائن خر بمجموعة من الصفات لي كتميزو على الباقي، والتصنيف العلمي كيقول بلي الانسان مجرد "حيوان" عندو صفات كتميزو على باقي الحيوانات..

اما بخصوص دوك لي كيقولو ان "الانسان اصلو قرد" فهذا كلاخ ومافاهمش النظرية غير عاود ليه شي كالاخستان آخر وقاليه بنادم اصلو قرد وبقى يعاود فيها، النظرية مكتقولش ان اصل الانسان قرد لا، النظرية كتقول بلي كاين واحد السلف مشترك بين الانسان والقرد يعني أنه كان واحد النوع، واحد الكائن منقارض وهاد الكائن خرجو منو مثلا 2 ديال الاصناف مثلا وهاد الاصناف لي تفرعو من هاد الكائن المنقرض هوما القردة والبشر ولكن مكيتطابقوش، حيت هاد الصفة لي كيتشاركو فيها القردة والبشر ماكتميل لا للبشر لا للقردة، حيت الكائنات الحية كتقاسم واحد السلف أو صفة مشتركة اما بخصوص صلة القرابة بين القرودة والبشر هادي كترجع للأدلة والبراهين لي كتبين لينا واحد تطابقات بين الحمض النووي ديال "الشمبانزي" والحمض النووي ديال الانسان، وقدروها العلماء بأن "الشمبانزي" هو أقرب كائن شبيه للإنسان من خلال التطابقات ديال كلا الحمضين النوويين، وهاد التطابق ماشي 100 فالمية لا غير 98.5 فالمية، والحاجة لخرى لي كيتقاسمها الانسان مع الشمبانزي هو واحد العدوى فيروسية سميتها (BRB) حيت الانسان والشمبانزي عندهوم 16 فيروس مطابقين فالحمض النووي، ولحد الآن باقين خدامين على هاد التطابق......موهيم هادي هي نظرية التطور ديال "داروين" لي النص فالمغرب فاهمينها غلط....
نتمنى يكون الشرح فالمستوى نتشاوفو فشي موضوع خر..

بقلـــم: الــﺴـــــــﺎﻋـــــﺮ