"ﺍلإنتحــــــــــــــﺎر" Suicide
فهاد الموضوع غنهضر على واحد الظاهرة لي كلنا كنعرفوها ولي ولات منتاشرة بزاف لي هي "الإنتحار"...نمشيو للموضوع...
"الإنتحار" اولا قبل مندخل فالموضوع خصكوم تعرفو بلي الانتحار مكانش فالقديم ومكانش فالعروبيات يعني الإنتحار جابتو المدينة..وجا مع التمدن..
الانتحار عندو أسباب كثيرة منها الإكتئاب والاضطراب النفسي بحال الهوس والفصام فالشخصية والبلية بما فيها الشراب والمخدرات وكاينة أسباب خرى بحال الفقر والمشاكل فالعلاقات الشخصية...الخ، لكن أكثر الاسباب فالانتحار هو "الإكتئاب" علاش ؟ هاد الاكتئاب كيتسبب لبنادم فواحد الخلل وكايضرب ليه التوازن الكيميائي فالمخ ديالو، وهنا الانسان لي عندو اكتئاب كيفشل ومكيبقاش يآمن بالمستقبل وهاد الاكتئاب كيخلي بنادم يفكر غير فالحاضر، بنادم لي عندو مرض الاكتئاب صعيب تقنعو بلي غادي يداوا وحتى هو ماعمرو غايطلب منك مساعدة وهاد الاكتئاب كيخليهم يحسو بلي مكاين تاواحد معاهم وكايولي عندهم بنادم زايد ناقص بحال العائلة والاصدقاء...بنادم لي عندو اكتئاب كيحس براسو غير عايش غا هكاك وماعندو حتى دور فدنيا وغير زايد وهادشي كيتسبب ليه فواحد الألم نفسي وبالتالي كيشوف الحل الوحيد باش يرتاح ويتهنى من هاد الألم هو الانتحار...
الإكتئاب كيداوا ولكن شي ناس غالطين بزاف كايقولك كانتكيف الحشيش ولا كانسكر باش ننسى الهم؟ لا أخويا را الإكتئاب والبلية مكيتلاقاوش بحالا سكرتي ومشيتي تصوگ را النتيجة باينة، كيما الحديد مكيتلاقاش مع الشراب نفس الشي مع الاكتئاب والبلية، البلية والشراب ماكتنسيش الهم وماكتنقصش من الهم والإكتئاب بالعكس غير كاتزيد مرض على مرض....
كايموت اكثر 800 ألف منتحر فعام واحد، وأغلب هاد المنتحرين عمرهوم بين 15 و29 عام، علاش كينتاحرو هاد الناس ؟ وشناهي الأسباب لي كتخليهم ينتاحرو ؟...
من اسباب الانتحار كاينة المشاكل النفسية بحال "الإكتئاب" الحاد لي كايخلي بنادم ديما كاعي وعيان ومبقاش عندو اهتمام وكيفقد الأمل وكيحس براسو غا زايد...
وكاين "الهوس" هاد الهوس كيخلي بنادم يكون عندو واحد الخلل فالمزاج مثلا يقدر يكون كيضحك وفرحان وفالبلاصة كيتقلب ويولي طالع ليه دم...
وكاين "الفصام" هاد الحالة كتخلي بنادم يكون انورمال وكايولي بنادم يحس ويشوف شي حاجة مكيناش فالواقع ويبدى يتوهم شي حوايج مكيتقبلهاش العقل..
وكاينة حالة خرى سميتها "اضطراب الشخصية الحدية" هاد الحالة كتخلي المشاعر ديال بنادم تكون مزعزعة وغير مستقرة وكتولي عندو انفعالات وأغلب المصابين بهاد الحالة كيكونو تعرضو للعنف بزاف ولا تمارس عليهم الجنس ففترة الطفولة...
كاينة حالة خرى سميتها "فقدان الشهية العصبي" هاد الحالة كتكون عند بنادم لي عندو اضطراب فالماكلة، وكتخلي بنادم يحس براسو غليض وخصو ينقص الوزن ديالو وكيتعقد وبالتالي كينتاحر...
وكاينة حالة خرى سميتها "الميول الجنسية" هاد الحالة كتكون خاصة بالناس المثليين، مثلا شي مثلي فاش كيتقمع فشي دولة كيبان ليه الحل الوحيد هو ينتاحر هادشي علاش جاو بزاف ديال جمعيات حقوق المثليين..
كاينة حالة خرى لي هي "الجينات" كاينين شي دراسات كيقولو بلي الجينات ديال بعض الناس كتأثر على الحالة النفسية ديالهم وكتخليهم ينتاحرو...
وكاينة أمور خرى كتسبب فالانتحار بحال البطالة كتخلي بنادم يحس براسو مكيسوا والو فالمجتمع ومعندوش فلوس والناس لي عندهم كريدي بزاف ومقادرينش يخلصوه حتى هوما كينتاحرو بالاضافة للناس لي كيكونو وحدانيين حيت الوحدانية كتخلي بنادم يكون سلبي وميكونش اجتماعي وكيبدى يفكر ويخمم حتى كتجمع فيه الامراض النفسية وكينتاحر وكاينة حاجة خرى وهذا ميصاج لشي ناس غالطين بزاف، هاد الحالة هي "الإدمان" بنادم لي كيكون مبلي مدة طويلة اما بالحشيش اما بالشراب كيولي عندو اكتئاب واينفوا تحيد ليه البلية كاتشدو القطعة ويلا ملقاش باش يشري البلية كيمشي ينتاحر حيت كيكون وصل لواحد المرحلة خطيرة فالإكتئاب "الإكتئاب الحاد"...
فعام 1978 غادي توقع اشهر عملية انتحار جماعي دارتها واحد الطائفة دينية ميريكانة طائفة "جونز" بقيادة "جيم جونز" هاد عملية الانتحار انتاحرو فيها 918 واحد من أعضاء معبد "بيبولز تيمبل" ناضو هاد ناس خلطو عصير العنب بالسيانيد السام وشربوه وطاحو كومة، ومن أبشع عمليات الانتحار هي لي نتاحرو فيها 10 آلاف ياباني فمعركة "سايبان" فعام 1944 هاد الناس تلاحو من "منحدر بانزي"...
ومن اكثر الدول لي لي نتاشر فيها الانتحار هي ألمانيا خاصة من بعدما خسرات لالمان فالحرب ونتاحر هتلر كانو الناس خايفين لاينتاقمو منهم الروس والإنجليز وبداو ينتاحرو ونتاحر حوالي 3880 واحد من بعد انتحار هتلر، الناس كانو متأثرين بالحرب وخسرو عائلاتهم بالاضافة لسقوط النظام النازي والاعتداء الجنسي الجماعي لي تعرضات ليه اكثر من مليون مراا ألمانية من طرف الروسيين، وهادشي خلا بنادم يمشي ديريكت ينتاحر بلا ميفكر...وكإضافة قراو كتاب "الانتحار" لإميل دوركايم..موهيم هادشي لي كاين نتمنى يكون الموضوع فالمستوى...نتشاوفو فشي موضوع خر..
بقلــــم: الـﺴــــــــﺎﻋــــﺮ
Aucun commentaire:
Enregistrer un commentaire