مجـــــــازر بشـــــريـــــــة

مجـــــــازر بشـــــريـــــــة.

الأم القـــــاتلــــــة "تيــــريزا كـــــونـــــر"

حنا كنعرفو الأم هي آخر وحدة غاتبغي لولادها الشر، مهما كانت الظروف ماعمر الأم غاتفوت ولادها وتعطيهم بالظهر ولا تآديهم، هادشي لي كنعرفو على الأم ولكن آش بان ليك فواحد الأم كتقتل ولادها وتخدم بناتها فالدعارة ؟ هادشي فشكل ياك..نمشيو للموضوع باش تفهم..

الأم القاتلة "تيريزا كونر" تزادت ف1946 فكاليفورنيا، واليديها مفحالهومش وكانت هي الصغيرة فخوتها وكانت عزيزة على مها كثر من خوتها لخرين، كانت "تيريزا" عايشة بيخير مع واليديها تال واحد نهار غايمرض باها "جيم" بمرض "باركنسون" ف1950 غاتعقد حياتها، حيت من بعدما مرض باها غيبقى جالس فدار وولا كيتعصب ويضارب مع مها وكيضرب خوتها على شي حاجة بسيطة، ولكن مع ذلك مها كانت دايرة جهدها باش تحافظ على الشمل ديال العائلة ومتخليش لادها يتشردو وبدات كتخدم باش تحسن الوضعية ديال العائلة المادية والاجتماعية، الأمور كانت شوية مزيانة تال واحد نهار غايتشتت فيه الشمل وغاتقلب حياة "تيريزا" رأسا على عقب، بالضبط ف 1961 غادة تموت مها"سويني" بسباب مرض القلب، من بعدما ماتت مها غاتدخل "تيريزا" فحالة اكتئاب، حيت كانت أقرب وحدة لمها، هنا غاينوض باها غيبيع الدار وغاتزاد تعقد الأمور، "تيريزا" غتخرج من المدرسة وغاتمشي تزوج من واحد السيد سميتو "كليفورد سانديس" وولدات معاه ولد  وكانت فعمرها 16 عام فاش تزوجات، ولكن هاد الزواج ماطولش بزاف حيت بداو يوقعو مشاكل بينها وبين راجلها وكانو ديما مضاربين حيت كانت كاتغير بزاف وكيحساب ليها كيخونها..

من بعد مدة غاينوض بيناتهم واحد الصداع وكانت ديك ساعة حاملة غاينوض راجلها "كليفورد" غايهددها بلي غايخرج وعمرو غيرجع لدار يالاه بدا يجمع حوايجو هزات "تيريزا" فردي وتقبات ليه راسو بقرطاسة ومات من بعد جاو لبوليس شدوها ولكن من بعد قالت ليهم بلي قتلتو باش ندافع على راسي حيت كان سكران وضربني وطلقوها، من بعدما طلقوها غاتولد واحد درية سميتها "شيلا" وفهاد الفترة غتبدى دير علاقات جداد مع رجال خرين وغاتعطيها للبيران وغاتزوج 4 المرات وغاتولد معاهم 4 دراري خرين هوما (سوزان، روبرت، تيري، ويليام) ومن بعد غادة طلق منهم كاملين وغاتعيش مع ولادها..

هنا غاتبدى تعطيها غير للبلية والشراب وغتبدى تضرب ولادها وتعقدهوم، كانت كتحرقهوم بالگارو وتهددهوم بالسلاح وكانت كتسد عليهم ومكتخليهمش يخرجو وكتمنعهم يهضرو مع بنادم..هادشي كامل باش تخوي فيهم داك السخط لي فيها فهاد الفترة غاينوض ولدها الكبير "هوارد" غايهرب من دار وغايغبر هنا غاتحقد على جوج بناتها لي هوما "سوزان" و "شيلا" حيت بداو يكبرو وكانت حاقدة بزاف على "سوزان" حيت كانت تيتيزة على عكس الأم "تيريزا" لي بداو كيبانو فيها تجاعيد فوجهها وكيحساب ليها بلي "سوزان" سحرات ليها وباش تنتاقم منها كانت كتعدبها وكانت "تيريزا" كتقول لولادها لخرين يضربوها. من بعد غاتهرب "سوزان" من دار وغاتمشي عند لبوليس وتعاود ليهم كلشي ولكن ماصورات والو حيت "تيريزا" قالت ليهم بلي بنتها عندها مرض عقلي ورجعاتها لدار من بعد غاتهز فردي وغاتيري فيها فظهرها بلا رحمة بلا شفقة ولكن لحسن الحظ ماماتتش، "تيريزا" ماداتش بنتها لسبيطار باش تجبد القرطاسة من ظهرها لا لا، دارت ليها بيطادين وفاصمة وخلات ليها القرطاسة فظهرها وداوات ومن بعد غتعاود تقب ليها ظهرها بمقص..

"سوزان" تقهرات من مها وقررات باش تخوي الدار وتمشي تقلب على راسها ومشات عند مها "تيريزا" ودوات معاها بلي باغة تخوي الدار، الأم القاتلة وافقات ولكن قالت ليها غانخليك تمشي من دار ولكن بشرط نجبد القرطاسة من ظهرك عاد تمشي، ماشي حيت بقات فيها لا لا حيت خافت لاتسيفطها للحبس بديك القرطاسة، صافي وافقات "سوزان" ومشات مها عيطات على ولادها باش يعاونوها يجبدو القرطاسة، وجابت شي دوا ديال الاضطرابات العقلية وشي مهدئات باش تبنجها وجابت موس خشاتو ليها فظهرها باش تجبد القرطاسة لكن للأسف "سوزان" غادي يوقع ليها تسمم فالدم هنا الأم القاتلة غاتفكر تخلص من بنتها بأي طريقة وغاتديها لحدا واحد الواد وغاتشعل فيها العافية وهي حية ومن بعد غتلوحها فالواد وترجع فحالاتها..

من بعدما صفاتها لبنتها اللولة غايبان ليها البلان فبنتها لخرى "شيلا" وغتبدا تعدب فيها وغاتسيفطها تخدم فديور الدعارة باش تجيب ليها فلوس  وفعلا داكشي لي كان بدات بنتها كتمارس الدعارة وكتجيب ليها فلوس ولكن مع المدة غيمرضو ولادها لخرين هنا غاتحقد على بنتها "شيلا" وغادي تاهمها بلي هي سباب فمرض ولادها وكتقول ليها بلي فيك امراض جنسية وعاديتيهم من خلال كرسي المرحاض لي كيتشاركوه، وغاتشدها غاتسد عليها فواحد الخزانة وغتقطع عليها الما والماكلة ومن بعد مدة غاتبدا تشم "تيريزا" شي ريحة خانزة فديك الخزانة غاتجي تشوف غاتلقى بنتها "شيلا" ماتت غتشدها غاتخشيها فواحد الكرطون وغاتمشي تلوحها بعيد من بعد غيلقاوها البوليس ولكن مقدروش يتعرفو عليها..السفاحة "تيريزا" غاتخاف لايشدوها البوليس غتنوض تشعل العافية فدار وغاتهرب مع ولادها  ولكن غايهربو عليها وكل واحد فين هرب باستثناء "روبرت" هو لي بقى معاها وهربو ل"لاس فيغاس" وعاشو تما تال 1991 غايتشد روبرت من بعدما قتل واحد السيد من بعدما ساقت مو لخبار غاتهرب لمدينة"سالت لاك سيتي" وتخبات تما..

من بعد عامين ف 1993 عاتمشي بنتها الصغيرة "تيري" وغاتديكلاري بيها وعاودات ليهم كلشي والعداب لي دوزات عليهم مهوم ومن بعد مدة غايشدوها، السفاحة "تيريزا"كانت خايفة من الإعدام لذلك قالت ليهم غنعتارف بشرط ماتعدمونيش ومن بعدما اعتارفات ضربوها بالحبس مدى الحياة وعاشت بنتها "تيري" بيخير وعلى خير اما خوتها لخرين غبر ليهم الأثر...هاد ليسطوار كتبين بلي المشاكل الاجتماعية تقدر تحول بنادم من انسان بريئ لقاتل لا يرحم، ربما الظروف والمشاكل لي عاشتها "تيريزا كونر"هي لي حولاتها لقاتلة مشاو بناتها ضحية..هاد ليسطوار مثلو عليها شي أفلام بحال (The Afflicted) وشي افلام خرين...موهيم هادشي لي كاين نتمنى يعجبكم الموضوع وكالعادة نتقاشعو فشي بلان خر طهلاو.

بقلــم: الـﺴـــــــﺎﻋــــﺮ
Gerard Lopez