الطاطواج__الوشام

#الطاطواج__الوشام

بما انني قررت نديرو .. عندي شي معلومات على Tattoos بغيت نشاركها معاكوم ولا كان شي حد عارف حاجات اخرى يفيدني .
تاريخ الوشام كايرجع لعهد ما قبل الميلاد ب سنوات .. كانو معروفين بيه القبائل و الجيوش و الحباااسة و كايستعملوه كرموز دلالية على شي حاجة كاتميزهوم و البعض كان كايعتابرو شكل من أشكال العلاج حيت كايجيهوم بحال الوخز بالإبر
ف بعض الاحيان الناس كان يتم توشيمهوم بزز منهم و كمثال معسكرات الاعتقال النازية حيت عتابروه رمز لتحديد هوية السجين
كاين وشام ديال الحرايفية و كاين ديال واحد هاوي غي كايجرب ف راسو ولا ف غيرو .. ديال الحرايفية لي بطبيعة الحال كاتكون عندهوم تجربة و خبرة ف الفنون التشكيلية وعارفين التقنية كومون صاسباص.. كايكون بآلة خاصة Tattoo gun كايخرج متقون و الرسمة باينة يقدر يستعمل فيه الوان و أشكال و يتفنن ف الرسمة على حسب رغبة حامله .. اما ديال واحد هاوي فالعكس تماما كايجي باهت و خضر تقول طراس د شي دقة ماشي تاتواج ههههههه
الآلة مع مرور الوقت حتا هي طورات .. من بعد ما كانت قبل كاتم عملية التوشيم باستخدام اليد او ادوات يدوية بحال الابر برؤوس حادة ولا عظام د الحيوانات .. ذخلات الوسائل الكهربائية و كانت اول الة صنعها واحد الشخص سميتو صامويل اورالي عام 1890 و مع التطور التكنولوجي را مشاو بعيد ف اختراع آلة مناسبة لوشم أدق و أكثر جمالية
ف السنوات الاخيرة نتشر بزااف ولا من هب و دب كاينوض يدير تاتو .. لي داير تذكار ولا رموز دينية او سحرية ولا مقولة أثرت فيه .. وغيرها
- المنظور الديني : الاسلام حرم الوشم ب دليل الرسول قال :"لعن الله الواشمة و المستوشمة" كي العادة كثرت الآراء و اتفق العرب على ان لا يتفقو و الناس ديال الافتاء كل واحد و آش كايقول .. و اليهودية كذلك حرمت الوشم اما الديانات الاخرى ما عندها حتا موقف ضد التوشيم
- المنظور الصحي : يقال انه من بعد ما كاذخل الصباغة تحت البشرة الجزيئات ديالها كايأترو على الجهاز المناعي و ف بعض الاحيان اذا الجهاز المناعي ماقدرش يتغلب عليها كاتسبب مرض جلدي لحامل التاتو
- المنظور القانوني : هذا ما ندويوش عليه حيت ماشي سوقو كلا يضبر ل كرو لحمو هداك ملك ل صاحبه وليس للدولة يرسم فيه كي بغى
كاينين لي دارو تاتو و ندمو عليه مي را موجودة الامكانية لا بغيتي تحيدو ماكايناش شي حاجة بيغمانونط دابا ؛ و كاين لي دارو و ماندمش عليه عاجبو راسو ومازال باغي يزيد وشام اخرين من حقو .. و عندنا جداواتنا دايرينو و ف وجههوم كاع و عادي
للإفادة فقط ✌