أبليكاسيون

#أبليكاسيون

مع الثورة ديال السمارتفون لي دايرة خبلة فالعالم هاد العصر خرجوا بزاف ديال ليزابليكاسيون بأفكار فريدة من نوعها. هنا غادي نهضر على خمسة من أغرب ما لقيت فالبلاي ستور
نبداو بأول وحدة ولي سميتها Nothing ومعناتها "والو" الفراغ، تاحاجة. و فاش كتدخل ليها كتلقا فعلا تاحاجة فقط كلمة nothing وسط الشاشة فقط. هاد التطبيق تيليشارجاه أكثر 500 ألف شخص حول العالم
تطبيق آخر ولي جاب فكرة مسطية وهو I am Rich بمعنى "أنا غني" هاد التطبيق استهدف الناس لي تيبغيو احسو بأنفسهم أغنياء أو لي تيحب ابان بلي راه اللعاقة موجودة. هاد الأبليكاسيون معندها حتى فائدة و الثمن ديالها يقدر ب 4000 درهم. الفكرة مورا هاد التطبيق هو أنه لي امتالكها راه تيقول بلي عندو فلوس لي يخسر فوالو. و الرابح الأكبر هو صاحب الفكرة ديال التطبيق.
التطبيق الثالث هو cuddlr وهو على شكل شبكة اجتماعية كتجمع محبي التعناق. يعني كل شخص مسجل فهاد الأبليكاسيون يمكن ليه إشوف الأشخاص لي حتى هما منخرطين و قراب ليه فالخريطة ديال المكان لي هو متواجد فيه تيتلاقاو و أراك للتعناق ههه. هاد التطبيق مجاني و متوفر حاليا فقط لهواتف الآيفون بالنسبة للأندرويد قريبا غادي اكون متاح.
التطبيق الرابع لي حتى هو الفكرة ديالو هاربة هو places I've pooped من العنوان ديال التطبيق امكن لينا نعرفو بلي المقصود ديالو هو المناطق لي قضيت فيهم حاجتي. المستعمل ديال التطبيق وقتما دخل لشي مرحاض عمومي فينما كان تيسينياليها فالأبليكاسيون و تيعطي التقييم ديالو لداك المكان باش المستعملين  الآخرين و الأصدقاء اكونو على بال فين غاديين.
التطبيق الخامس و الأخير اسمو Run Pee و الفكرة ديال هاد الأبليكاسيون جات من الموقف لي تيوقع بعد المرات فاش كتكون كتفرج فشي فيلم و نتا مزير باغي تمشي للطواليط ولكن الفيلم زوين و ماباغيش تخلي حتى شي لقطة تزهق. هنا فين هاد التطبيق تيدّخل بحيث كتعطيه اسم الفيلم و  هو تيقوليك إمتى امكن ليك تضربها بجرية للمرحاض فاللقطة لي ماعندهاش أهمية فالفيلم كامل
هادو غير خمسة من بزاف و الابتكارات معندهاش حدود. خصوصا فاش القضية تيكون فيها الصرف. اذن شكون عرف من هنا للقدام أشمن عجب غايخرج

بكلافيي:Ucef Yesta