نظــــريـــــة الأكـــوان المتعـــــددة

"نظــــريـــــة الأكـــوان المتعـــــددة"
The Multivers Theory

فهاد الموضوع غنهضر على واحد النظرية، لي ختالفو فيها الآراء بين المؤيدين والمعارضين كنظن سمعتو بيها...موهيم نمشيو للموضوع

نظرية الأكوان المتعددة أول واحد غايطرحها هو الغيلسوف "ويليام جيمس" ولكن تاواحد ماتسوق ليها قالو هاد خونا غا كيخربق علينا من بعد غايجي واحد الفيزيائي سميتو "هيو إيفرت"هاد السيد من بعدما دار واحد التجربة فميكانيكا الكم سميتها "الشق المزدوج" بانت ليه ديك النظرية ديال "ويليام جيمس" هنا غايتعمق فيها ومن بعد غايتكبو عليها كاع العلماء وكل واحد كيفاش كيحللها...

بعض العلماء بداو يقولو بلي جنون والأشباح هوما سكان من شي أكوان خرى داكشي علاش مكنقدروش نشوفوها وكاين لي كيقول بلي هاد الأكوان كاينة فشي أبعاد خرى وكاين لي كيقول بلي هاد الأكوان متوازية مع العالم ديالنا باش يتحقق واحد التوازن فكلا الكونين مثلا داكشي لي فليمن ديال الكون ديالنا كاين فليسر ديالهم يعني كاين واحد الانعكاس،...اينشتاين كيقول بلي العالم بحال شي كتاب فيه بزاف ديال صفحات وكل صفحة عبارة عن عالم أو كون مستقل بذاتو، مثلا ايلا كان الكون ديالنا عبارة عن صفحة مكتوبة بستيلو العالم لاخر لي فصفحة تانية غيكون مكتوب بحبر سري وميمكنش لينا نشوفوه حيت المواد لي مكون منها داك الكون مختالفة على المواد لي مكون منها العالم ديالنا لذلك ميمكنش لينا نشوفوه نهائيا...

حنا كنعرفو بلي كل واحد فينا عندو 40 شبه، وهاد الأشباه ديالنا عايشين فدوك الأكوان، يعني نتي ولا نت كاينين منك نسخ خرين ف أكوان خرى مثلا نت فهاد لحظة كتقرى فهاد البوسط غاتكون كتفرج فتلفازة فشي كون خر ولا تكون كتاكل فشي كون خر ولا كتمارس الجنس فكون خر ولا ناعس، ويلا كنتي أستاذ فهاد الكون غتكون شفار فشي كون خر ولا رئيس فشي كون آخر...الى آخره، علاش كيكون عندنا هاد الشبه ؟ العلماء كيقولو بلي كاع الخيارات والمشاكل لي كنواجهوها كيكون عندها بديل وطريق خرى ولكن مكندركوهش، مثلا نت فاش كتكمل قرايتك فلافاك كاتولي قدام 3 ديال اختيارات: اما تكمل قرايتك فبلادك ولا دوز لسوق الشغل تخدم ولا تسافر تكمل قرايتك برا، لنفرض نت ختاريتي دوز لسوق الشغل باش تخدم، كيبقاو جوج اختيارات ماختاريتيهومش هاد جوج اختيارات كيختارهم الشبيه ديال فأكوان خرى مثلا الشبيه اللول غيختار يكمل قرايتك فبلادك والشبيه التاني فشي كون آخر غيختار يسافر يقرا برا، يعني جميع الاختيارات كتوقع فأرض الواقع من بعدما كتختار الاختيار اللول كاع الاختيارات لي بقاو كيوقعو فأكوان خرى وأي خيار وأي مسار خديتيه فهاد الكون كيكونو عليه مسارات واختيارات بديلة فالأكوان لخرى...

كاينين فرضيات كيقولو بلي حتى دوك الاصناف لي نقارضات من هاد الكون كتعيش فأكوان خرى بحال الديناصورات وبلي البشر غيكون نقارض فدوك الأكوان يعني العكس ديالنا، كيفاش تخلقو هاد الأكوان ؟ كيقولو العلماء بلي الكون ديالنا موازي لأكوان خرى يعني مقاربين وفهاد الحالة كيوقع واحد الاصطدام بين الكون ديالنا والأكوان لخرى وهاد الاصطدام كيولد واحد الإنفجار (Big bang) وهاد الانفجار كيخلق لينا كون خر يعني كلما وقع اصطدام كايجي معاه انفجار وكيخلق كون جديد، هاد الأكوان ميمكنش لينا نشوفوها نظرا للمادة لي مكونة منها هاد الاكوان ولكن العلماء ديال "موجات الراديو" كتاشفو واحد المنطقة فارغة كبيرة بزاف هاد المنطقة الفارغة بعيدة علينا ب8 مليار سنة ضوئية والقطر ديالها مليار سنة ضوئية تقريبا، هادي ماشي اول مرة كيكتاشفو العلماء منطقة فارغة كانو اكتاشفو حوالي 30 منطقة فارغة المساحة ديالها ملايين سنة ضوئية ولكن هاد المنطقة كبيرة بزاف مقارنة مع الكون ديالنا، جاو بعض العلماء بغاو يفسرو هاد القضية قالو بلي هاد البقعة الفارغة تخلقات بسبب واحد تأثير ديال واحد الاصطدام بين العالم ديالنا والعالم لاخر المجاور فاش يالاه بدى يتكون...

باش تفهمو مزيان نستحضرو واحد تجربة ديال واحد العالم سميتو "أرفين شرودنغر" هاد السيد جاب واحد تجربة سميتها "قطة شرودنغر" كيفاش البلان ديال هاد تجربة ؟ نجيبو واحد صندوق ونجيبو واحد المشة ونجيبو واحد الجهاز كيربط بين واحد المادة مشعة وبين واحد الغاز سام (غاز سيانيد)، نديرو هاد المشة فهاد الصندوق ونديرو معاها هاد المادة المشعة والجهاز لي غايربط بين المادة ووغاز سيانيد ونسدو عليها واحد ساعة ديال المگانة، فهاد الحالة كاين احتمال ديال 50 فالمية غادي تبدى تحلل المادة المشعة وغادي يتحرك غاز سيانيد السام وغايقتل المشة، ولكن قبل مانحلو صندوق غانطرحو سؤال واش المشة حية ولا ميتة، فالمنطق المشة غتكون حية ولا ميتة ونسبة الاحتمالين 50 فالمية ميتة و50 فالمية حية هادي فالمنطق السليم، ولكن ف"عالم الكم" المشة غاتكون فحالة "تراكب" يعني حية وميتة فنفس الوقت من خلال التراكب ديال جوج دوال (دالتين موجتين)، اللولة كتقول (الذرة لا تتحلل، المشة حية) والدالة الموجية الثانية كتقول (الذرة تتحلل، المشة ميتة)...ملي غانحلو الصندوق الدالة الموجية غادة تهرس وغادة تشد حالة وحدة اما مشة ميتة اما مشة حية، هنا غنستحضرو التفسير ديال "كوبنهاغن" هاد السيد غايقول لينا بلي ملي حلينا الصندوق الدالة الموجية ماتهرساتش وماشداتش وحدة من جوج حالات (ميتة ولا حية)؛ لا لي كيوقع هو ان الكون كينقاسم لجوج اكوان فلحظة القياس وبالتالي ايلا حلينا صندوق ولقينا المشة حية را غتكون ميتة فالكون لاخر الموازي للكون ديالنا وهذا كيعني ان الأكوان لخرى كاتشكل ف أي لحظة، وبلي العدد ديالها غير نهائي..

نعطيكم مثال خر مثلا دخلتي لشي بوتيكة باش تشري شي تيشورت ولكن لقيتي 3 ديال تيشورتات ب3 ديال الألوان واحد كحل وواحد بيض وواحد خضر مثلا، نت مثلا ختاريتي تشري تيشورت بيض فهاد اللحظة بالضبط راك شريتي تيشورت الكحل فالكون الثاني وشريتي  تيشورت الخضر فالكون الثالث...

نظرية الأكوان المتعددة لحد الآن ماعليها حتى شي تأكيد ولكن  كاينين شي مسلمين كيربطو هاد نظرية بواحد الآية، قال الله تعالى:"الله الذي خلق سبع سماوات ومن الأرض مثلهن يتنزل الأمر بينهن لتعلموا ان الله على كل شيء قدير وان الله قد احاط بكل شيء علما" صدق الله العظيم،..هاد النظرية خرجو عليها بزاف ديال الأفلام (The One, Another Earth, The Butterfly Effect)...موهيم هادي مجرد نظرية احتمال ديالها واش بصح ولا لا غيبان من هنا لقدام هادشي لي كاين نتمنى يكون الموضوع فالمستوى نتقاشعو فشي موضوع خر✌

بقلــم: الـﺴـــــــﺎﻋــــﺮ
Gerard Lopez